Ia 5.000 bazkiderekin, 100 boluntario baino gehiagorekin eta 8 langile-bazkiderekin giza-baliabideek aldea ezartzen dute Goienerren.
Iaz Goiener Elkartea osatu zen, Goienerren proiektua bermatu eta egungo eredu energetikoa aldatzen laguntzeko helburuak zituela.
Goiener Elkarteak Goienerren proiektua sustatzeko aisialdiaren zati bat eskaintzen dugun 100 boluntario baino gehiagoren lana egituratu eta bermatzen du. Lan hori, besteak beste, infoguneetako arreta eta informazioa ematean, hitzaldi, feria eta jardunaldietan parte hartzean, metering ekintzetan, energiarekin zerikusirik daukaten auzietan (pobretasun energetikoa kasu) laguntzean eta abarretan gauzatzen da.
Joan den ekainaren 18an Zubietan (Gipuzkoa) Goienerreko boluntarioen eguna ospatu genuen.
Topaketa Goienerreko eztabaida-leku guztietan ohi den giro ederrean gauzatu zen, eta boluntariotzaren antolaketa hobetzeko eta bere lana, langile-bazkideekin koordinatuz, eraginkorrago egiteko gaiez hitz egin zen.
Horretaz gain taldeen lanaz ere hitz egin zen; hau da, administrazioa, komunikazioa, merkaturatzea, sorkuntza, gizarte ekintza, eta abar. Eta gidatze taldea osatu zen. Talde horrek Goienerren arlo guztiak koordinatzea du helburu.
Jardunaldia giro ederreko bazkari batekin amaitu genuen, bertan konplizitateak ehuntzen eta taldea kohesionatzen jarraitu genuen, eta, jakina, mundua konpontzen.
Ezinbestekoak diren alderdi praktikoak gutxietsi gabe, era honetako jardunaldiek balio dute, batez ere, Goienerren aldea ezartzen duten giza-baliabideen energia berrindartzeko.
