Uda bukatu ondoren, eta lana bideratzeko bilerak egin ostean hamaika hitzaldi, jardunaldi eta azoketan hartu dugu parte azken aste hauetan.
Irailaren 16an Gasteizko Salburuako azokan parte hartu genuenetik hainbat lekutan izan gara energiaren trantsizioaren beharra azalarazteko eta kooperatiba energetikoen zeregina ikusarazteko.
Barakaldoko BECen izan ginen Bioculturaren barruan. Azkenengo urteetan bezala sarrerak eskaini genizkien GoiEnerreko bazkideei. Zoritxarrez, igande arratsalderako agortu zitzaizkigun banatzeko genituen sarrera guztiak, eta Bioculturaren antolatzaileak ez ziren fin ibili.
Urriaren 8an Bilboko San Frantzisko auzoko jaien barruan parte hartu genuen REASek antolatutako azoka solidarioan.
Egun berean Zarauzko ekonomia alternatibo eta solidarioaren III. azokan izan ginen. Udaletxe aurreko plaza partekatu genuen Fiare, Oikocredit, Emaus, Lakari eta beste 11 elkarterekin.
Asteburu horretan bertan gure hiru kidek hartu zuten parte Toledon estatuko kooperatiba energetikoen bilera garrantzitsuan.
Beste hainbat ekitalditan izan gara, baina denak aipatzeak luze joko luke. Hurrengo hitzorduak ere asko dira. Hala ere, nabarmendu nahi dugu eta, bide batez, gonbidatu nahi zaituztegu 21, 22 eta 23an Iruñeko Refenan egingo den kontsumo arduratsu eta produktu ekologikoen II. azokara. Bertan izango gaituzue (programa PDFan).
