Nafarroan gertatzen den bezala Araban ere beste lau eoliko-proiektu erraldoi proposatu dira, kasu honetan Eusko Jaurlaritzaren energia-agentziak –EEEk– (% 40) eta Iberdrolak (% 60) osatutako Aixeindar sozietatearen bidez: Azazetan, Iturrietako mendietan, Arkamon eta Labrazan.
Proiektu horiek, gainera, Euskal Autonomia Erkidegoko Lurralde Antolamenduaren Gidalerroen (128/2019 Dekretua, uztailaren 30ekoa), foru-, autonomia- eta Europako ingurumen-arloko araudi espezifiko ugariren aurka ezartzen dira, eta hori guztia proposatutako kokalekuei legezko estaldura ematen dien Energia Eolikoaren Lurralde Plan Sektorialik gabe.
Arabako Mendiak Aske manifestuan agerian utzi dituzte proiektu hauek gauzatzeak gure natura-ondarean izango lituzkeen ondorio konponezin eta kaltegarriak: mendi komunalen pribatizazioa, ingurumen-balio handiko naturaguneak industrializatzea, paisaiaren inpaktu izugarria, inpaktu akustikoa; biodibersitatearen galera eta sare hidrologikoan duten eragina.
Guzti hau kontuan izanda Goiener Elkarteak bat egiten du egoera larri horren aurrean, manifestuan azaltzen diren eskaerekin:
- Ingurumen-balio handiko eta -hauskortasuneko mendi-eremuak energia-ekoizpeneko era guztietako zentralak ezartzeko bazterketa-eremu izendatzea, premiaz.
- Abian dauden proiektuak berehala geldiaraztea, bitxia bada ere, guztiak Araban kokatuak.
- Leku antropizatuagoak, irisgarriagoak eta ekologiaren eta paisaiaren ikuspegitik inpaktu txikiagoa dutenak lehenestea.
- Zentral eolikoak eremu antropizatuetan eta ekoizpen-zentroetatik hurbil kokatzea
Azkenik azpimarratu ekimen honetan alegazioak biltzeko kanpaina zabalik jarri dutela.
Argazkia: Hala Bedi Irratia
